2024 жылғы 23-25 ақпанда Астана қаласында Қазақстан, Қырғызстан, Өзбекстан, БАӘ және Гонгонгтың 3000-нан астам үздік оқушыларының қатысуымен «Central Asia FIRST Championship» робототехника бойынша ең ірі чемпионат өтті.
Павлодар облысының намысын FIRST Lego League Challenge санатында (10 жастан 16 жасқа дейінгі балалар) 8 команда қорғады: «Robodrive8» командасы (дарынды балаларға арналған №8 мектеп-лицей), «Fixiefy» және «Affinity» командалары (дарынды қыздарға арналған “БІЛІМ-ИННОВАЦИЯ” лицей-интернаты), «Smartkids» командасы (Абай атындағы дарынды балаларға арналған гимназия), «Bayanaul» командасы (З.Ақышев атындағы ЖОББМ, Баянауыл ауданы), «Art wizards» командасы (Павлодар қаласының № 21 ЖОББМ), «Electro squad» командасы (Павлодар қаласының Ш. Шоқин атындағы ЖОББМ), «Roboheart» командасы (Павлодар қаласының №2 ЖОББМ).
LEGO League Explore санатында (6 жастан 10 жасқа дейінгі балалар) 2 команда өз өнердерін көрсетті: «Renaissance» командасы (Saturn Robotics school), «Billion team» командасы (RoboPark Ekibastuz). FLL Explore (6-10 жас) жас санаты бойынша жарыс қорытындысы бойынша Екібастұз қаласындағы Robopark мектебінің «Billion team» командасы екінші орынды, Павлодар қаласындағы Сатурн мектебінің «Renaissance» командасы (№27 ЖОББМ және А.Шамкенов атындағы мектеп-лицейінің оқушылары) үшінші орынды иеленді.
First Lego League Challenge санатында Art wizards командасы (Павлодар қаласының №21 ЖОББМ) «Қырағы сұңқар» жобасын сапалы дайындағаны үшін кубокпен және «Motivation award» сертификатымен марапатталды. «Баянауыл» командасы (З. Ақышев атындағы ЖОББМ, Баянауыл ауданы) үздік әлеуметтік желі бағытында абсолютті чемпион атанып, роботпен ойында I орын алды.